O domingo botamos a andar do Ventorrillo á praia de Riazor

by

Ruta do Ventorrillo á praia de Riazor

ACTIVIDADES | PASEOS POLO BARRIO   Os Paseos polo Barrio comezan, literalmente, este domingo 9 de xuño. Aínda que o pasado 25 de maio xa nos vimos nunha das aulas do centro Ágora para confeccionar, de modo colaborativo, as catro rutas propostas pola coordinadora desta actividade, Cristina Anllo, agora é cando toca facer os camiño a pé, acabalos e fialos coa memoria. E como por algún sitio hai que empezar, farémolo cun itinerario entre O Ventorrillo e a praia de Riazor.

Este primeiro paseo ten en total 3,35 quilómetros, así que non botaremos máis de 4 horas a camiñar. Participar é moi sinxelo. Abonda con inscribirse enviando un correo a [email protected] e presentarse puntualmente o domingo ás 10 da mañá na entrada principal do Centro de Saúde do Ventorrillo, até onde podes desprazarte coas liñas 6, 6A e 7 do autobús urbano. Non esquezas de que vai isto e trae un calzado axeitado –pisaremos máis dun charco, con certeza–, protección contra o sol para a pel e a cabeza e algunha bebida para hidratarse.

Seguir lendo →

Escoita a Barriografía da taberna A Grade

by

ACTIVIDADES | BARRIOGRAFÍAS  “Si canta mal, no cante. Si canta bien, cante fuera”. Así foi como a “hostalaría de formica” dos anos setenta expulsou a canción dos bares e así foi como comezou Xurxo Souto a súa cuarta Barriografía para Música en Branco o pasado venres 31 de maio, contra as oito da tarde, alí onde “o talento popular insiste e resiste”. Na taberna A Grade, na rúa Andrés Gaos, no corazón da Agra do Orzán, co local ateigado e as gorxas dispostas para unha maratón vocal de hora e media.

Á beira de Xurxo, un dos protagonistas do serán: Ricardo Seixo, voz abenzoada, veciño do barrio, aínda que nado en Curtis, e porfiado animador do grupo de canto popular da Asociación de Veciños Agra do Orzán. A parroquia coñéceo precisamente por iso, pero esta Barriografía tamén serviu para rescatar grazas ao tocadiscos a súa traxectoria musical. Comezando por Regueifa (1979), un dos temas aos que lle poñía voz en Verbas Xeitosas –un grupo que nacera na Escola de Maxisterio da Coruña na primeira Transición e que chegaría a gravar dous LP–, e seguindo con Romance de cego: in memoriam de Federico García Lorca, colaboración con Suso Vaamonde para ¡Abolición!, disco colectivo contra a pena de morte.

As voces de Parabéns, en acción

As voces de Parabéns, en acción

Seguir lendo →

Coñezamos un pouco máis Radio SPV

by

MICROHISTORIAS   Se as Barriografías de Xurxo Souto para Música en Branco pasaron polo CEIP San Pedro de Visma foi, entre outras moitas razóns de peso, porque existe Radio SPV. É a radio libre das alumnas e os alumnos deste colexio situado á beira da Rolda de Outeiro, que eles chaman tamén Radio Patio ou Radio Tuku-Taka, en homenaxe a un dos artistas máis populares entre a súa audiencia, Centollito. Cancións dedicadas, entrevistas, parabéns de aniversario ao máis puro estilo Xabarín Club, retransmisións deportivas ao vivo ou mesmo reflexións en voz alta das cativas. Un mundo.

Rocío Cuñarro é a profesora que se encarga de coordinar e animar Radio SPV todas as mañás á hora do recreo. Nunca colle o micro. O seu é o traballo na sombra. Neste pequeno vídeo que gravamos aproveitando o furacán radiofónico do pasado 22 de maio explícanos algo máis desta experiencia e outras anteriores, tamén no campo da radio escolar.

Aquí podes escoitar completa a Barriografía protagonizada polo alumnado do CEIP San Pedro de Visma:

http://www.ivoox.com/barriografia-2-ceip-san-pedro-visma_md_2070561_1.mp3″ Ir a descargar

Música en Branco en ‘Tod@s somos a Agra!’

by

NÓS   O proxecto Música en Branco participará este venres en Tod@s somos a Agra! Apúntaste a construír o teu barrio?, un encontro organizado pola Asociación Sociocultural Abraio e cuxo propóstito pasa por crear vencellos de comunidade entre os diversos colectivos da zona. Con ese obxectivo, T@dos somos Agra tomará a rúa Barcelona dende primeira hora da mañá. Ás 10 abriran todos os postos informativos de cada unha das asociacións participantes e o muro das suxestións, no que se recollerán propostas e observacións de toda a veciñanza que se achegue ao encontro.

Ás 11.30 horas comezarán as actividades coa presentación ao público, precisamente, de Música en Branco. Este proxecto, desenvolvido por Sinsalaudio para o Concello da Coruña, será o o primeiro en pasar á palestra para se dar a coñecer. Unha hora máis tarde, será a quenda dos organizadores, que a partir das 12.30 explicarán en que consiste Tod@os somos Agra! e, acto seguido, lanzarán a súa iniciativa de Banco de Tempo Comunitario.

Xa pola tarde, a partir das 16.30, desenvolverase unha xuntanza cos veciños e veciñas do barrio. Será unha sesión aberta na que se falará do presente e o futuro do barrio, mais tamén do pasado a través da memoria e as lembranzas. Xa ás 18.00 horas, o protagonismo recaerá en Cuac FM, a radio comunitaria que explicará na Agra o seu funcionamento e obxectivos. Unha hora despois, o colectivo Ecos do Sur presentará Agra Activa como peche das palestras. Finalmente, terán lugar unha serie de cantares polo barrio para poñerlle o colofón a un día no que, ademais, haberá un feixe de actividades paralelas destinadas ao público infantil.

Vémonos o venres, vémonos na Agra.

CARTEL CALLE BARCELONA - copia

Xa podes escoitar a Barriografía da Silva

by

ACTIVIDADES | BARRIOGRAFÍAS   Estreamos as Barriografías a bordo dun autobús, na liña 7, no traxecto de Monte Alto a Rolda de Outeiro, entre a pasaxe habitual e os medios de comunicación que viñeron descubrir con nós esta viaxe comandada por Xurxo Souto polos sons, as músicas e as memorias da xente da Agra do Orzán. Desprazámonos logo ao colexio de San Pedro de Visma para recoller, non había nada que inventar, todo o talento que cada mañá no tempo do recreo enche a grella de Radio SPV, a radio libre das alumnas e os alumnos, que eles chaman tamén Radio Patio e Radio Tuku-Taka.

Para a terceira etapa, o equipo da radio itinerante subiu barrio arriba até o antigo couto da Coruña, A Silva, onde se daban, dicía Xurxo Souto con fachenda, coma se fose mesmo da zona, os mellores repolos, o mellor trigo e o mellor millo da volta, o cereal que logo ía dereito aos antigos muíños da Agra do Orzán. Máis de medio cento de persoas responderon a chamada das Barriografías nos exteriores do Centro Cívico da Silva. Ambientazo.

Últimas instrucións antes de empezar: aínda habería que engadir cadeiras até tres veces

Últimas instrucións antes de empezar: aínda habería que engadir cadeiras até tres veces

Seguir lendo →

Paseos polo barrio: catro rutas colaborativas para “ler unha cidade camiñando”

by

As catro rutas dos Paseos polo Barrio

ACTIVIDADES | PASEOS POLO BARRIO   “A realidade das cousas nunha cidade hai que ir atopala aos barrios”. Con estas palabras, La Opinión de A Coruña titulaba unha entrevista a Xurxo Souto, o responsable das Barriografías, os programas de radio itinerante que se desenvolven dentro de Música en Branco. A realidade da cidade, polo tanto, hai que saír buscala, apalpala nós mesmos para descubrir que se agocha detrás de cada esquina, ao outro lado da beirarrúa, ao longo dunha avenida. A cidade, como dicía Fernández Paz e lembrou hai pouco o propio Souto, é un libro que se le camiñando. E, a diferenza de calquera novela, este tipo de lectura pódese realizar na compaña de moitos. É unha lectura compartida e, partindo desta idea, o pasado sábado unha vintena de persoas comezaron a escribir as liñas dun libro urbano chamado Paseos polo barrio.

O Centro Ágora acolleu a primeira fase desta nova actuación de Música en Branco. Trátase dunha actividade de sendeirismo urbano, dirixida por Cristina Anllo e que se materializará en catro rutas diferentes para conectar o barrio con distintos puntos da cidade. A Agra do Orzán, pola súa situación e natureza, resulta un eixe vertebrador da cidade para o tránsito urbano que, ademais, conta con grandes posibilidades para se converter en canle de circulación peoníl. Paseos polo barrio, atendendo a esta particular natureza, pretende trazar unha serie de itinerarios que faciliten a conexión a pé entre a Agra e lugares determinados da urbe.  E para iso, o sábado, convocouse un obradoiro colaborativo no que unha vintena de persoas debateron as mellores posibilidades para as camiñadas, partillaron lembranzas e trazaron eles mesmos os itinerarios que se levarán a cabo.

Cristina Anllo explica a metodoloxía aos participantes no obradoiro

Cristina Anllo explica a metodoloxía aos participantes no obradoiro

Cristina Anllo, a directora da actividade e experta en paixasismo urbano do grupo Microprojets, serviu de canalizador. Simplemente foi a faísca necesaria para que prendese a colaboración entre veciños “de toda a vida” do barrio, novos habitantes da Agra, coruñeses chegados doutros barrios e persoas que, como Sergio, quixeron unirse ao proxecto para “aprender”. Os participantes formaron grupos de traballo e responderon ao convite de Anllo, quen ofrecía a cada grupo unha das catro proposta de traxecto que ela mesma elaborara.

Seguir lendo →